6 AGOSTO
Coggius SS.ma Trasfigurazione  - Zerfaliu (OR)

O misteriu sublimadu
caparra d’eterna gloria
tengamos semper in memoria
a Gesùs trasfiguradu.

1. Perdu e Giuanne assumesit
Gesùs ancoras e Giacu,
e de su misteriu tant’altu,
partecipes los fatesit
de lughe celeste apesit
vestidu s’apostoladu.

2. In su Tabor monte terrestre
in disparte los giamesit
inie si trasfiguresit
de lughe tottu celeste
che nie bianca sa veste
che sole sa cara hat rajadu.

3. Inie mentras pregada
a sa presenzia de tres
cun Elia e cun Moises
de sa morte sua resonada
ch’in Gerusalem disdiciada
t’heret in breve toccadu.

4. Candu Moises ed Elias
si partesit Perdu esclamende,
inoghe est bonu fatende
tres tendas, sa prima a tie;
in tale alta genìa
Perdu consolu hat dadu.

5. Sa secunda a Moises
sa terza s’edifichet
e inoghe si meditet,
sa gloria de tot is tres
personas de fama e rees
chi su mundu hat illustradu.

6. Mentras Perdu resonada
lughente nue adumbresit
Giuanne e Giacu chi miresit
cando Cristos adoperada
de ue una oghe alzada:
Cust’est fizu meu istimadu.


7. Cun affettu piùs cumpiaghente
esclamat: Dilettu Fizu,
cando bos dat su consizu
Ascurtadelu attentamente
Chi est Deus Onnipotente
uguale a Babu increadu.

8. Sos apostolos cun timore,
ruesin tottus in terra
los cumbinchet senza gherra
los confortat in amore
candu s’amadu Signore
a pees s’est accostadu.

9. Paternamente esclamesit;
Coraggiu pesade in altu
non timedas chi non fattu
che bos dare consolu nesit
e tando lis rivelesit
cuddu misteriu occultadu.

10. Alzan sos ojos a chelu,
e ateru non bien piùs
si non solu a Gesus
cale prima senza velu;
e cunfessan senz’e rezelu
cust’est su Verbu incarnadu.

11. Cumandat Jesus e Domine,
cando fallesit e su monte
niunu su fattu raccontet
ne lu tengat piùs a nomine,
fin a chi su Fiz’e s’Omine
hat a esser resuscitadu.

12. Cun sa gloria cuntemplende
transitemos custa vida,
pustis a sa dispedida
cun sa matessi gosende
e in su chelu triunfende
de su superbu infuriadu.

13. Mirade Cristos Signore
custu popolu pasimante
chi bos supplicat costante
cun ojos de veru amore
pro chi teninde dolore
detestet ogni peccadu.